香港新浪網 MySinaBlog
« 上一篇 |
Helen | 17/11/14 | 淺影視評 | (639 Reads)

相信很多人都是導演的名氣或往績去看這套電影, 自己都曾經被電視廣告吸引, 不過都未至於即刻去戲院睇......直至某個星期二晚, 諗住隨便選一套戲可以用戲票優惠, 結果就決定看了~

看完其實好似諗到好多嘢......人老咗, 文筆可能冇以前組織得咁好, 不過都想寫吓...其實自己睇咗好多話劇都想寫, 不過結果都係揀呢套...可能又係偏心啦......寫得感想就有劇透, 不喜歡就不要看下去啦~

 

 

故事不算新穎, 講述地球慢慢步向滅亡, 主角希望拯救自己一家人, 於是重新踏上太空之旅, 希望可以找個適合人類居住的新星球, 不過當然波折重重, 最後千辛萬苦重見家人, 但已經"回頭已是百年身"...

這套戲, 一看完的感覺, 就係導演同編劇的計算精密周詳, 每一個段落都可以引起很多很多的想法和話題......一開始不是什麼星際飛行, 而是地球步向末日, 就已經提醒我們保護環境、保護地球的重要......編導大膽假設, 當我們愈來愈倚重科技, 偏偏農業其實由始至終卻是最重要,維繫眾人的生命, 當大家什麼都種不到, 有糧食危機, 就算有最新的電話、電腦、飛機、機械人都好, 都不能用來活命......主角冇得做太空人, 都寧願務農, 其實頗有歸隠的意味, 不過當然"麻煩"不知不覺找上門...

最初由主角女兒聲稱見到"鬼"開始, 大家都跌入編導精心設計的思考陷阱, 以為是什麼超自然力量, 好似變咗睇鬼片......但原來最後開估時, 大家才知道首尾互相呼應......原來所謂的"鬼", 是男主角突破了時間、空間的限制, 在黑洞異空間"重新"回到仍是年少的女兒身邊, 用書櫃去說出NASA的位置, 提示她要千方百計留住自己的爸爸在地球, 亦透過手錶提示她解破重力、空間迷團的方法......誇張的情節其實都不是太站得住腳似的, 但既然從來冇人入過黑洞, 編導用了巧妙的方式自圓其說, 突顯時間、重力、空間的奇幻之餘, 更突顯人與人之間的"愛", 可以穿過時間、空間的界限, 令到他的女兒可以"拯救"世界, 提醒我們, 愛、人與人之間關係的重要, 都是個人很欣賞的主題......但, 個人覺得, 以編導的風格, 其實這個"完美"結局 (即係人類得救/父女重逢)係咪一定是真的? 定係只係男主角的幻想? 定係只係大家的幻想? 如果男主角為了救女同伴, "葬身"黑洞, 究竟他是歸於虛無? 還是他去到他想見到的"結局"空間呢? 另外, 小女兒見到/感覺到的"鬼", 是不是一定是她的爸爸呢?......這個有趣的故事真使人有很多聯想...

說到太空冒險, 那些什麼太空船、蟲洞、黑洞、機械人......已經樣樣都可以寫N篇論文......但個人卻覺得, 最觸動人心, 一定係太空旅行令到時空改變, 太空人在外太空的一日, 地球可能已經過了好幾年......當男主角同女同伴探索第一個星球但失敗時, 看到自己家人的一生匆匆而過, 小女兒已經長大成人, 還怪他為什麼都不聯絡自己時, 聽到好多人都即刻拿紙巾抹眼淚......人生在世匆匆幾十載, 對比浩瀚的太空, 人類有幾多能力? 又有幾多改變世界的能力?...探索宇宙, 唔駛見到外星人怪物, 唔駛好多波折, 一個大浪已經殺死人; 一個轉身, 已經等了23年; 一個背叛者, 已經令到計劃差點失敗, 少少意外都可以粉身碎骨......其實會唔會"STAY" (留低), 寧願同屋企人一齊死, 定係既然要死, 寧願把握機會, 為了人類的未來, 衝出太空? 留下還是走, 都係如果面對末日之時, 大家值得深思的問題......沒有對錯, 只有看人究竟看什麼比較重要......

最後, 其實邊個在黑洞"幫"了男主角呢? (其實喺入面聽到TARS的聲音都係不明...唔知其實係咪真係個機械人, 定係...) 如果人類有一日真係超越了時空限制, 看到了"人世"的本相, 或者發現我們之上, 原來仲有千千萬萬的世界, 那, 眼前的一切, 又有幾真實? 又需要幾在乎?......

可以想的, 可以寫的, 太多了......不過老公睇完卻覺得有點無聊......唔, 其實自己覺得這套戲拍得好出色, 一切計算精準, 不過全部意念係咪新穎, 又唔一定, 而且好明顯科幻、親情、恐怖、咩題材都大包圍, 又真係有點唔知點講好......但在主流的戲中, 來一套可以讓人思考人生、思考更深的電影, 這2.5小時都算有價值的......

看了其他影評, 都有不少有用的意見, 大家都可以看看呀~~ 

http://www.vjmedia.com.hk/articles/2014/11/11/90558

http://www.vjmedia.com.hk/articles/2014/11/08/90334

http://www.filmcritics.org.hk/%E9%9B%BB%E5%BD%B1%E8%A9%95%E8%AB%96/%E6%9C%83%E5%93%A1%E5%BD%B1%E8%A9%95/%E3%80%8A%E6%98%9F%E9%9A%9B%E5%95%9F%E7%A4%BA%E9%8C%84%E3%80%8B%EF%BC%9A%E6%BA%AB%E5%92%8C%E5%9C%B0%E8%B5%B0%E9%80%B2%E5%A4%AA%E7%A9%BA

http://thehousenewsbloggers.net/2014/11/06/%E3%80%8A%E6%98%9F%E9%9A%9B%E5%95%9F%E7%A4%BA%E9%8C%84%E3%80%8B%EF%BC%9A%E4%BA%BA%E6%80%A7%E6%98%AF%E4%BA%BA%E9%A1%9E%E6%96%87%E6%98%8E%E7%99%BC%E5%B1%95%E7%9A%84%E5%82%AC%E5%8C%96%E5%8A%91/

http://yfl-kelvin.com/2014/11/11/%E6%98%9F%E9%9A%9B%E5%95%9F%E7%A4%BA%E9%8C%84interstellar/